Бесплатный фрагмент - Psalterium Goticum

BOKOS PSALMONO

— A — Audags sa manna ist saei ni gaggiþ in ragina unsibjaize, jah in wiga frawaurhtaize ni standiþ jah in gafaurdai frawardjande ni sitiþ. Ak in witoda frajins wilja is ist, jah witoþ þis þagkeiþ is sis dag jah naht. Jah ist swe bagms sa ussatida at urrunsim watne saei akran sein taujiþ in mela swesamma jah laufs þizei ni þaursniþ, jah alla þoei waurkjai boteiþ. Ni swa sind unsibjans, duþe ei sind swe ahana þizaiei afwairpiþ winds [af andawleizna airþos]. Duþþe ni gastandand unsibjans in stauai, nih frawaurhtans in gamainþai garaihtaize. Unte wait frauja wig garaihtaize, iþ wigs unsibjaize fralusniþ.

— B — Duhve gadrobnodedun þiudos, fadreineizuh gamitodedun lauso. Faurastandand þiudanos airþos jah fauramaþljos garinnand samaþ, ana fraujan jah ana is xristu. Gabrikam þos naudibandjos ize, abuhwairpam af unsis þizai jukuzjai ize. Sa bauands himin bihlahjiþ [ins], frauja meins bimampeiþ ins. Þan rodeiþ du im in þwairhein seinai, inuh hatiza seinamma drobeiþ ins. Akei ik gasalboda þiudan meinana, ufar siona jainamma fairgunja meinamma þamma weihin. Gateiha gagreft [fraujins], frauja qaþ mis sunus meins is þu ik himma daga gabar þuk. Bidei at mis jah giba [þus] þiudos gafreidein þeina, jah þein haimoþli andjos airþos. Haldis ins wandau eisarneinamma, swe kas airþein brikis ins. Þannu nu o þiudanos fraþjaiþ, sijaiþ gatalzidai o stauans airþos. Skalkinoþ fraujin miþ agisa, jah faginoþ [imma] miþ reiron. Kukeinai ufkunnjaiþ baur ibai þwairhs sijai [frauja], jah sijaiþ fraqistidai [us] wiga [garaihteins]. Duþe ei intundnan swe leitil skal þwairhei is, audagai sind allai þai gatrauandans in imma.

— G — Psalmo ist daweidis, at þliuhandin imma faura andwairþja abaissalomis þis sunaus is. O frauja hva biauknodedun þai þreihandans mik, managai reisand ana mik. Managai qiþand saiwalai meinai, nist ganistais imma in guda [is] Diapsalma. Akei þu o frauja is skildus faur mik, wulþus meins jah sa ushauhjands haubiþ mein. Stibnai meinai fraujan wopja, jah hauseiþ mis us fairgunja seinamma þamma weihin Diapsalma. Ik galiga gahslepa, urreisa unte frauja insakiþ faur mik. Ni og mis filusnos manageins, þozei bisunjane drauhtinond ana mik. Usstand o frauja usþins mik o guþ meins, unte slahis allans fijands meinans bi kinnu tunþuns unsibjane brikis. Fraujins ist naseins, jah ana þeinai managein ist þiuþiqiss þeina Diapsalma.

— D — Prautaupsaltau, in xaurdeim soh psalmo ist daweidis. Wopjandin mis mis gahausei o guþ garaihtiþos meinaizos, in aglon auk urrumides mik gaarmai mik gahhausei bida meina. O sunjus mans und hva wulþus meins du unsweriþai ist, sijuþ frijondans uswissi jah sokjandans liugn Diapsalma. Gaþ~þan~witjaiþ þatei ussokida frauja airknan sis silbin, frauja andhauseiþ [mik] wopjandin mis du sis. Þwairhaidai sijaiþ akei ni frawaurkjaiþ, rodjaiþ in hairtam izwaraim ana badjam izwaraim jah anahveilaidai sijaiþ Diapsalma. Saljaiþ hunsla garaihtiþos, jah trauaiþ du fraujin. Managai rodjand hvas ataugeiþ unsis þiuþ, ustaiknei ana unsis þata liuhaþ andaugjis þeinis o frauja. Galagides fahedais in hairtin meinamma, mais þau þanei kaurn ize jah wein ize [jah alew ize] biauknodedun. In gawairþja samana liga jah slepa, unte þu o frauja ains þwastiþa bauan letis mik.

— E — Prautaupsaltau, du anheiloþ~aurganam soh psalmo ist daweidis. Waurda meina gahausei o frauja, gakunþa habai þo miton meina. Andhausei stibnai hropis meinis o þiudan meins jah guþ meins, duþe ei at þus im bidjands. O frauja in maurgina gahauseis stibna meina, in maurgina fauragamanwja mik þus jah im usbeidands. Duþe ei ni guþ wiljands unselein þu is, ni bauiþ at þus ubils. Nih wisand dwalai faura augam þeinaim, fijais allans waurkjandans ungaraihtein. Fraqimis [allaim] qiþandam airziþa, mann bloþe jah liuteins andspeiwiþ frauja. Iþ ik bi filusnai armahairteins þeinaizos atgagga du razna þeinamma, inweita faura alh þeinai þizai weihon in agisa þeinamma. O frauja briggais mik in garaihtiþai þeinai in þize mik þreihandane, garaihtjais faura andaugja meinamma þana wig þeinana. Unte nist in þize munþam sunja, brusts þize ist fralusts. Hlaiw uslukanata ist waisunda þize, tuggon seinai suþjand. Afdomei ins o guþ, gadriusaina fram þaim garehsnim seinaim. Bi filusnai missadede ize uswairp im, unte sind andaneiþans þus [o frauja]. Jah sifaina allai þai trauandans in þus, du aiwa faginona. Jah sunjonds sijais ufar im, jah swegnjaina bi þuk þai frijondans namo þein. Duþe ei þu þiuþeis garaihtana o frauja, swaswe brunjai leikainai wipanana habais ina.

— Q — Prautaupsaltau, in xaurdeim ana auktaxaurda soh psalmo ist daweidis. O frauja ni in þwairhein þeinai gasak mik, nih in moda þeinamma mik fraweit. Gaarmai mik o frauja unte afmauiþs im, gahailei mik o frauja unte sind gadrobida baina meina. Jah saiwala meina gadrobnoda filu, iþ þu o frauja und hva. Gawandei þuk o frauja galausei saiwala meina, ganasei mik in airkniþos þeinaizos. Unte nist in dauþau bi þuk gamundais, in hailjai hvas andhaitiþ þus. Im siukands in swogateinai meinai, im þwahands in allamma nahte mein badi im tagram meinaim ligr mein natjands. Þaursu warþ fram saurgai augo mein, fairni warþ us allaim þaim hatandam mik. Fairrjaiþ izwis af mis o allai jus waurkjandans ungaraihtein, unte hauseiþ frauja stibnai gretis meinis. Andhausida frauja aihtron meina, frauja bida meina andnimiþ. Gaskamaina sik jah indrobnaina filu allai fijands meinai, gawandjaina sik jah sik gaskamaina suns.

— Z — Soh gaunons ist daweidis, þoei saggw sa du fraujin bi saka xusiis þis bainiamineitaus. O frauja þu guþ meins in þus gatrauands im, ganasei mik af allaim þaim wrikandam mik jah galausei mik. Ibai frawilwai sa swe liwa saiwala meina, tahjands miþþanei nist uslausjandins [nih ganasjandins]. O frauja þu guþ meins jabai gatawida ik þata, jabai ist unselei in lofam meinaim. Jabai usgald ik sibjin meinamma ubil, jah warþ galausjands þana gaþreihandan mik uswissja. Wrikadau fijands saiwala meina jah fahadau, jah trudadau in airþa libain meina wulþuh meinana du muldai brikadau Diapsalma. Usstand o frauja in þwairhein þeinai, ushafei þuk þairh moþ þize hatjandane mis. Jah urreis mis þizai stauai þoei anabaust, jah gaqumþs fadreine bigaggai þuk. Jah bi ija du hauhein gawandei þuk, o frauja sijais stojands manageins. Mik ussokei o frauja bi garaihtiþai meinai, jah bi unwammein meinai þizai ana mis. Anaslawai ubil unsibjaize jah gatulgjais garaihtana, gakauseiþ þan hairtona jah hairþra guþ sa garaihta. Skildus meins ist in guda, þamma nasjandin raihtans hairtin. Guþ ist staua garaihts [jah mahteigs jah lats þwairheim], jah guþ baitrs in allamma dage. Jabai hvas ni gawandeiþ sik hairu seinana ushvasseiþ, bugan seinana gagaraihteiþ jah gamanweiþ ina. Jah þamma manweiþ wepna dauþaus, arhvaznos seinos wrakim waurkeiþ. Sai ganam sa inwindiþa, jah qiþuhafts warþ unselein jah gabar anaqiss. Groba was grabands jah usgrof ija, jah gadraus in hlaiwasn þoei gawaurhta. Gawandjada unselei is in is haubiþ, jah ana is giblan anamahts is gasagqjada. Andhaita fraujins bi garaihtiþai is, uzuhsiggwa namin fraujins hauhistins.

— H — Prautaupsaltau, ana aurgana gaiþiskin soh psalmo ist daweidis. O frauja þu frauja unsar, hvaiwa wulþag ist namo þein ana allai airþai. O þuei gasatides andahait þein ufar himinam, fram munþa barne jah daddidaize. Gawaurhtes mahteigo in hatande þeinaize, du aftra gawandjan fijand jah wrak. Þande fairweitja in himinans þeinans þo waurstwa figgre þeinaize, in menan jah stairnons þoei gamanwides. Hva ist manna ei gamant ina, jah sunus adamis ei gawisos þis. Gaft þan imma leitil mins þau gudam, jah wulþau jah sweriþai waipt ina. Ina gasatides fraujan ufar þaim waurstwam handiwe þeinaizo, alla galagides uf is fotuns. Lamba jah auhsans alla þo, samaleikoh jah diuza haiþjos. Fuglans himinis jah fiskans mareins, þata hvarbondo þairh staigos mareino. O frauja þu frauja unsar, hvaiwa wulþag ist namo þein ana allai airþai.

— Þ — Prautaupsaltau, soh bi dauþau labenis psalmo ist daweidis. א Awiliudo [þus] o frauja in allamma hairtin meinamma, merja alla þo sildaleika þeina. Fagino jah swegnja in þus, liuþo namin þeinamma o hauhista. ב Sik gawandjandam fijandam meinaim ibukaim, afmauidai sind jah fraqistnand faura andwairþja þeinamma. Duþe ei gatawides meina staua jah meina saka, gasitands is ana stola stojands garaihtaba. ג Gahvotides þiudom frahqistides unsibjamma, namo ize afswarft du aiwa jah aftra. ה(?) Þamma fijand usfullnodedun gataurþeis du andja, jah baurgs habais gatauranos fraqistnoda gamunds izo ijos silbons. Iþ frauja du aiwa wisiþ, gamanwidana habaiþ stauai stol seinana. ו(?) Jah is stojiþ midjungard in garaihtiþai, domeiþ fadreinins in raihtiþai. ו Jah wairþiþ frauja saliþwos þraihanamma, saliþwos at hveilom þaim in aglon. Jah gatrauand in þus þai kunnandans namo þein, unte ni bilaist gasokjandam þuk o frauja. זLiuþoþ fraujin þamma bauandin sion, merjaiþ in manageim toja is. Duþe ei sokjands bi bloþa þans is gaman, ni ufarmunniþ hropa wainahaize. ח Gaarmai mik o frauja, gasaihv agliþa meina þo fram fijandam mik o þuei ushauheis mik af daurom dauþaus. Ei gateihau allos hazeinos þeinos in daurom þizos dauhtrs sionis, wairþau faginonds in naseinai þeinai. ט Gasugqun þiudos in þizai riurein ei taujandans wesun, in þamma natja ei fulhun gafahans ist fotus ize. Kunþs ist frauja sa stauos taujands, in waurstwam lofane seinaize ganutans ist unsibja muna Diapsalma. י Gawandjand sik unsibjans du haljai, allos þiudos ufarmunnandans guda. כ Unte ni du andja ungamunds ist unleda, wens wainahaize ni fraqistniþ du ajukduþai. Usstand o frauja ni jiukai manna, stojaindau þiudos faura andaugja þeinamma. Gasatei o frauja þlahsein im, ufkannjaina þiudos þatei manna sind Diapsalma.

— I — ל (?) Duhve o frauja standis fairra, þuk filhis at hveilom þaim in aglon. Us hauhhairtein unsibja usþriutiþ wainahamma, ganiutaindau eis in munim þanzei mitond. Duþe ei hazjada unsibja bi lustu saiwalos seinaizos, jah faihufrika þiuþjada sa frakunnands fraujin. Unsibjis bi hauhiþai nasos seinaizos ni sokeiþ ina, ni waihtai ist guþ sind allos gamitonos is. Gamainjanda wigos is in allamma mele sind hauhist stauos þeinos faura imma, allaim hatandam sik frakann þaim andaugiba. Rodeiþ in hairtin seinamma ni skal ik wagjan, du aldai jah aldai þozei sind ni in unþiuþa. Unþiuþeinais munþs is ist fulls jah liuteins jah listais, uf tuggon is sind sleiþa jah ungaraihtei. Saljiþ in biniuhseinai þaurpiskai and fulginans stadins maurþreiþ swiknana, augona is halkana niuhsjand. Beidiþ in fulhsnja swe liwa in [is] filigrja beidiþ gafahan wainahana, gafahiþ wainahana ganiutandin sis in natja seinamma. Hneiwiþ sliupiþ is, gah~þan~driusiþ in is klawom siukei armaize. Rodeiþ in hairtin seinamma ufarmunnoda guþ, affalh andaugi sein ni gasaihviþ du andja. ק Usstand o frauja þu guþ [meins] ushafei handu þeina, ni sijais ufarmunnands wainaham [þeinaim und andi]. Bihve frakann unsibja guda, qiþands in hairtin seinamma ni gasokeis. ר Gasaihvis unte þu arbaiþ jah þreihsl atsaihvis, du usgildan handau þeinai. Wiþra þuk bileiþada halka, widuwairnin þu is izei gahilpiþ. ש Gabrik arm unsibjamma jah ubilamma, swaswe gasokida sijai afgudei is jah unbigitana. Frauja ist þiudans aiw jah ajukduþ, fraqistnand þiudos af þizai airþai is. ת Lustau wainahaize andhauseis o frauja, gatulgei hairto ize andhulei auso þein. Du stojan widuwairnin jah haunidin, ei ni anaaukai þanaseiþs þlahsjan manna sa us þizai airþai.

— AI — Prautaupsaltau, þatuh daweidis ist, In fraujin gatrauands im, hve qiþaiþ saiwalai meinai þliuh fairgunjis izwaris swe fugls. Unte sai þai unsibjans buganana haband bugan haband gamanwida arhva seina ana þambai, du skiutan analaugniba raihtans hairtin. Þande gasuleinos gatairanda, garaihta hva taujan mag. Ist frauja in þiudangardjai seinai þizai weihon, frauja in himinam stols þizei ist. Augona is [in wainahana] fairweitjand, hvarmos is gakausjand sununs adamis. Frauja garaihtana kauseiþ jah unsibjana, jah frijondan anamaht fijaiþ saiwala is. Is rigneiþ ana unsibjans hlammom funin raihtis jah swibla, jah winds skurasama ist dails þis ize stiklis. Unte garaihts ist frauja sa garaihteins frijoþ, raihtamma gaumjand andwairþja is.

— BI — Prautaupsaltau, ana auktaxaurda soh psalmo ist daweidis. Gahilp o frauja unte fairlag airkna, unte wan ist triggwaize us sunum adamis. Uswissi rodeiþ hvarjizuh miþ frijond seinamma, sind wairilos liutos in hairtin hairtinuh rodjand [ubil]. Fraqisteiþ frauja allaim wairilom liutaim, tuggon waihte mikilaizo. Þaimei qiþand tuggon unsarai gajiukam, sind wairilos unsaros miþ unsis hvas ist frauja unsis. In þulainais wainahaize jah in swogateinais unledaize, nu urreisa qiþiþ frauja satja in naseinai ganiutaina þanei. Þo waurda fraujins sind waurda hrainja, silubr usfraisano in aison us airþai gahrainido sibun sinþam. Þu o frauja gahabais ija, gahfastais ija fram þizai nu aldai du aiwa. Bisunjane unsibjans gaggand, bi hauhiþai ungalaubis sunum adamis.

— GI — Prautaupsaltau, soh psalmo ist daweidis. Und hva o frauja ufarmunnis mis allis, und hva afwandeis andaugi þein af mis. Und hva galagja ragina in saiwalai meinai saurga aigands in hairtin meinamma dagans, und hva ushauheiþ sik sa fijands meins ufar mis. Fairweitei gahausei mis o frauja þu guþ meins, inliuhtei augona meina ibai gaslepau dauþau. Ibai qiþai sa fijands meins inswinþida ik mik þamma, þai þreihandans mik wairþaina faginondans þande gawagjaidau ik. Iþ ik in armahairtein þeinai traua, sifaiþ hairto mein in naseinai þeinai, siggwa du fraujin duþe ei gildands ist mis, [jah ussiggwa du namin fraujins hauhistins].

— DI — Prautaupsaltau, þatuh daweidis ist, Qaþ dwala in hairtin seinamma ni waihtai ist guþ, frawardidai jah andasetjai waurþun us tojam nist taujandins goþ. Frauja us himina insahv du sunum adamis, du gasaihvan jabai ist saei fraþjiþ saei sokeiþ gudis. Allai afairzidai sind sind samana unbrukjai, nist taujandins goþ nist ainishun. Niu sind fullaweisai allai þaiei waurkjand ungaraihtein, þai matjandans managein meina matjand hlaif fraujan ni wopjand. Þar sind faurhtjandans sis faurhtein [þarei ni wesi faurhteins], duþe ei frauja ist in kunja garaihtamma. Ragin wainahis gaaiwiskodedeiþ, þatei frauja ist saliþwos is. Hvas gibai us siona nasein israela, gawandjandin fraujin þana hunþ manageins seinaizos sifaiþ iakob faginoþ israel.

— EI — Soh psalmo ist daweidis, O frauja hvas gawisiþ in hleiþrai þeinai, hvas gabauiþ fairguni þein þata weiho. Sa gaggands unfairinodaba jah waurkjands garaihtein, jah qiþands sunja in hairtin seinamma. Unbirodjands tuggon seinai jah ungataujands frijond seinamma ubil, jah anaqiss unandnimands ana nehvundjans seinans. Ist frakunþs in þizei augam andasetja, iþ faurhtjandans fraujan sweraiþ. Swariþ du swesamma unþiuþa, jah ni inmaideiþ. Silubris seinis ni gibiþ fram wokra, jah gibos ana swiknana ni nimiþ. Saei taujiþ þo, ni gawagjada du aiwa.

— QI — Þatuh fraþi ist daweidis, Witai mis o guþ unte traua in þus, qaþ ik fraujin frauja meins is þu [þei]selei meina ni waihtai ist wiþra þuk. Ak du weiham þaiei sind ana airþai, du im jah du abram meinaim alls wilja meins in þaimei ist. Wahsjandau sleiþeins jainaim, þaiei du aljamma guda sniwand. Ni waihtai blota blotinassum ize þaim us bloþa, nih waihtai hafja namna ize ana wairilom meinaim. Frauja ist dails arbjis meinis jah þis stiklis meinis, þu is sa haldands þana hlaut meinana [mis]. Markos gadrusun mis in skauneim, samaleiko jah gafreideins [meina] ist fagra bi mik. Þiuþja fraujan saei garaginoda mis, unte jah nahtam talzjand mik hairþra meina. Gasatida ik fraujan faura mis sinteino, unte af taihswon meinai ist ik ni gawagjada. Inuh þis faginondo ist hairto mein jah sifands ist wulþus meins, samaleiko jah leik mein anahveilaida du wenai. Duþe ei ni bileiþis saiwalai meinai in haljai, nih atgibis airknin þeinamma gasaihvan riurein. Gakanneis mis staiga libainais, ist usfulleins fahede miþ andwairþja þeinamma gabaurjoþjus in taihswon þeinai sind aiweinai.

— ZI — Soh bida ist daweidis, Gahausei o frauja garaihtamma andhausei aihtron meinai, gahausei bida meina þo ni in wairilom hindarweisaim. Fram þeinamma andwairþja staua meina usgaggadau, þeina augona gasaihvandau garaihtein. Gakaust hairto mein meina gaweisodes naht, gakausides mik ni bigast waiht [in mis]. Mito ei ni skal ufargaggan munþs meins at þaim waurstwam manasedais, bi þamma waurda wairilo þeinaizo ik gahabaida mik af staigom wilwins. Gafastai gridins meinos in þeinaim staigom, ei ni afwagjaindau laisteis meinai. Ik atwopida þuk duþe ei gahauseis mis o guþ, anahnaiwei augo þein du mis anduhhausei razda meina. Ustaiknei armaion þeina, o þuei nasjis [þans in þus] trauandans af andastaþjam taihswon þeinai. Gahabai mik o frauja swe apl augins, skadau fiþro þeinaizo gahulei mik. Faura andwairþja þize unsibjane þaiei usagljand mik, fijande þize þairh saiwala þaiei bigaggand mik. Lundai swesai galuknodedun, sind munþos ize rodjandans hauhhairtaba. Bi griþ unsara sind nu bigaggandans uns, augona seina uslagidedun gahnaiwjan ana airþa. Analeiko swe liwa manwus du gafaha, sweh liwila sitands in fulginaim stadim. Usstand o frauja bisniu andwairþi is ina gadrausei, uslausei saiwala meina af unsibjin hairau þeinamma. Af riurjam þeinai handau o frauja, af mannam fairhvaus dails þizeei ist in libainai ize. Jah huzdis þeinis gafulleis þizeei wamba, sadai sind sunjus ize jah aflagjand laibos barnam seinaim. Ik in garaihtiþai fairweitja in andawleizn þein, saþs im urreisandin mis wlitis þeinis.

— HI — Prautaupsaltau, þatuh ist skalkis fraujins þis daweidis saei qaþ du fraujin waurda þis saggwis in dag þanei galausida frauja ina af lofin allaize fijande is jah af handau saülis. Qaþuh, Sels im þus o frauja þu maht meina, frauja ist hallus meins jah baurgswaddjus meina jah sa uslausjands mik. Guþ meins ist tulgiþa meina traua in þizaiei, skildus meins jah haurn ganistais meinaizos jah kelikn mein. Hazjands haita fraujan, abuh fijandam meinaim nisa. Dishabaidedun mik naudibandjos dauþaus, jah flodjus afgudeins gaþlahsidedun mik. Naudibandjos haljos gafaifahun mik, faursnewun mik hlammos dauþaus. In aglon þizai at mis ik wopida fraujan, duh guda meinamma hropida. Gahausida is us þiudangardjai seinai þo stibna meina, hropsuh meins sa du is andwairþja inniddja in ausona is. Jah wagida warþ jah reirandei airþa, jah grundjus fairgunje inreiraidedun jah gawagidai wesun unte moþs imma warþ. Urrais rauks us nasai is jah fon us is munþa fraitando, haurja brinnandona waurþun fram imma. Jah anahnaiwida himinans jah dalaþ atiddja, jah riqis uf fotum is was. Jah farida ana xairubeima jah fliugands was, jah sniwands was ana fiþrom windis. Jah lagida riqis analaugnein seina bisunjane sis, hleiþra is wesun riqiza wateina milhmane luftiskaize. Fram skeina þamma faura imma milhmans is fauriddjedun, hagl jah haurja funins. Jah gaf þeihvon in himinam frauja, hauhistah gaf þo stibna seina hagl jah haurja funins. Lailot arhvaznos seinos dizuhtahida þans, jah lauhmunjos aiauk gahdrobida þans. Jah ataugidai wesun brunnans watne jah andhulidai wesun grundjus midjungardis, fram gasahtai þeinai o frauja fram blesa anadins nasos þeinaizos. Ufrakida us hauhiþai anduhnam mik, mik atþans af watnam managaim. Uslausida mik af fijand meinamma þamma swinþin jah af þaim hatandam mik, unte inswinþnodedun ufar mik. Bisnewun mik in dag bireikeins meinaizos, akei warþ frauja du gatulgeinai mis. Jah ustauh mik ana rum, mik galausida unte imma galeikaida ik. Uzuhgaf mis frauja bi garaihtiþai meinai, jah bi hrainiþai handiwe meinaizo usgald mis. Duþe ei ik gahabaida wigans fraujins, jah unsibjis ni was faura guda meinamma. Duþe ei allos stauos is sind faura mis, jah garaihteins is ik ni aflagida us mis. Jah was ik unwamms miþ imma, jah gawitands mis af fairinai meinai. Jah gawandida frauja mis bi garaihtiþai meinai, jah bi hrainiþai handiwe meinaizo faura augam is. Miþ airknamma airkns wairþis, miþ waira unwammamma unwamms wairþis. Miþ swiknamma swikns wairþis, iþ miþ unseljamma unsels wairþis. Unte þu managein haunida nasjis, iþ augona hauhþuhta hauneis. Unte þu intandeis þata lukarn mein o frauja, guþ meins inliuhteiþ þata riqis mein. Unte in þus rinna þairh hansa, jah in guda meinamma steiga ufar waddju. Sa guþ [meins] unwammei wigs is ist ist waurd fraujins pistikein, skildus ist is du allaim þaim gatrauandam in imma. Duþe ei hvas ist guþ nibai frauja, jah hvas ist tulgiþa nibai guþ unsar. Sa guþ ist izei bigairdiþ mik mahtai, jah fragibiþ unwammein wig meinana. Izei gawaurkeiþ fotuns meinans swe þans hindo, jah ana hauheim meinaim gasatjiþ mik. Izei uslaiseiþ handuns meinos waihjon, swaswe brikada buga aizeins armam meinaim. Jah gaft mis skildu naseinais þeinaizos, jah taihswo þeina gaswinþeiþ mik [.] jah qairrei þeina gamikiljiþ mik [du andja, jah so talzeins þeina si mik galaiseiþ]. Braidos gataujis gridins meinos uf mis, jah ni sind siuka kniwa meina. Wrika fijands meinans jah faha ins, jah ni gawandja mik aftra faurþizei fraqumanai sijaina. Slaha ins jah ni magun usstandan, driusand uf fotuns meinans. Warst þan bigairdands mik mahtai du waihjon, ufhnaiweis allans andastaþjans meinans uf mik. Jah fijande meinaize warst gibands mis hals, jah þaim fijandam mik fraqistja. Atwopjand akei nist hvas ganasjai, bi fraujan akei ni gahauseiþ im. Jah distahja ins swe stubju þana wiþra andwairþi windis, swe fani gatwono gaibnja ins. Uslausides mik af sokeinom manageins, gasatides mik du haubida þiudo. Managei þoei ni wissa ik skalkinondans mis sind sind at hauseinai ausins ufhausjandans mis, sunjus aljakunjins gakunnun sik faura mis. Sunjus framaþjins ogun sis, jah faurhtjand sis uta þaim gardam seinaim. Qius ist frauja jah þiuþiþs sijai sa hallus meins, jah ushauhjaidau sa guþ ganistais meinaizos. Sa guþ ist izei gibiþ fraweit du mis, jah ufhnaiweiþ manageins uf mik. Izei uslauseiþ mik af fijandam meinaim samaleiko jah af þaim ana mik usstandandam ushauhides mik, af mann anamahtais uslausides mik. Inuh þis andhaita þus in þiudom o frauja, jah namin þeinamma ussiggwa. O þuei mikiljis ganistins þiudanis þeinis, jah taujis armaion xristau þeinamma þamma daweida jah du is fraiwa und aiw.

— ÞI – Prautaupsaltau, soh psalmo ist daweidis. Himinos merjand wulþu gudis, jah gaskaft handiwe is kanneiþ so tulgiþa. Dags du daga rodeiþ waurd, jah nahts du naht bairhteiþ witubni. Nist waurdis nih razdos, ni hausjada stibna ize. And alla airþa usiddja so wiko ize, anduh andjans midjungardis sind þo waurda ize. Sa sunnin galagida þaurp in þaim, jah ita swe bruþfaþs usgaggands us hetjon þizai is, faginondo ist swe swinþa rinnan spaurd. Fram andja himinis ist usgahts is jah bigahts is ist und andjans þis, jah nist þatei sijai galaugniþ faura warmiþai is. Witoþ fraujins ist unwamm gawandjando saiwalos, weitwodiþa fraujins ist sunjeina usfratwjandei niuklahans. Garaihteins fraujins sind raihtos gailjandeins hairto, anabusns fraujins ist hlutra liuhtjandei augam. Agis fraujins ist hrain gastandando du ajukduþai, stauos fraujins sind sunjeinos airknos alakjo. Þos gairnidons mais gulþa jah mais taupazia managamma, jah woþizeins þau miliþ jah drupans hretos. Jah skalks þeins witaiþs þaim ist, ist in þizo gafastainai laun manag. Airziþos hvas ufkann, af analaugnjaim gahrainei mik. Samaleiko jah af þuhtaim gahabai skalk þeinana ni waiht gafraujinona mis þos, þan ungafairinoþs im jah swikns af missadedai managai. Sijaina du leikainai waurda munþis meinis jah mitons hairtins meinis in andwairþja þeinamma [sinteino], o frauja þu hallu meins jah uslausjand meins.

— K — Prautaupsaltau, soh psalmo ist daweidis. Gahausjai þuk frauja in daga aglons, sijai sunjondo þuk namo gudis iakobis. Gasandjai hilpa þeina us weiha, uzuh siona þuk gaswinþjai. Gamunjai allaize hunsle þeinaize, jah sauþ þeinana andanems wisan munjai Diapsalma. Fragibai þus [frauja] bi hairtin þeinamma, jah allos mitonos þeinos ustiuhai. Waila sijum in ganistai þeinai jah in namin [fraujins þis] gudis unsaris weis gamikiljanda, usfulljai frauja allos bidos þeinos. Nu ufkunþa ik þatei ganasjiþ frauja xristu seinana, gahauseiþ imma us himina seinamma þamma weihin in mahtai naseinais taihswons seinaizos. Sumai in wagnam sumaih in aihvam, iþ weis in namin fraujins þis gudis unsaris hvopam. Eis gahniwun jah gadrusun, iþ weis urrisum jah sijum standandans. O frauja ganasei þiudan unsarana, gahausei unsis in daga atwopeinais unsaraizos.

— KA — Prautaupsaltau, soh psalmo ist daweidis. O frauja in swinþein þeinai swegneiþ þiudans, jah naseinai þeinai hvaiwa sifaiþ filu. Þana lustu hairtins is fragaft imma, jah þizai bidai wairilo is ni uskaust Diapsalma. Unte gamotides imma miþ þiuþiqissim seleins, atlagides ana haubiþ is waip taupazieinana. Libainais baþ at þus gaft imma, laggein dage aiw jah þanamais. Mikils ist wulþus is in naseinai þeinai, sweriþa jah mikilduþ uslagides ana ina. Unte satides imma þiuþiqissins du ajukduþai, gailides ina swegniþai miþ andwairþja þeinamma. Unte sa þiudans gatrauaiþ in fraujin, jah þairh armahairtein hauhistins ni gawagjada. Bigitiþ handus þeina allans fijands þeinans, taihswo þeina bigitiþ allans þans fijandans þuk. [Þei] gasatjis ins swe auhn funins at mel andwairþjis þeinis, frauja þwairhein seinai ufsagqeiþ ins jah gamatjiþ ins fon. Akran ize af airþai fraqisteis jah fraiw ize af sunum adamis. Duþe ei froþun ana þuk unþiuþam mundedun munins, þanzei [gataujan] ni magun. Duþþe atgaraihteis im amsans ize, ana þambom þeinaim gamanweis ana andawleizna ize. Ushauhei þuk o frauja in þeinai swinþein, siggwam jah ussiggwam maht þeina.

— KB — Prautaupsaltau, wiþra gabairhtein auzandilis soh psalmo ist daweidis. O guþ meins o guþ meins [gahausei mis] duhve bilaist mis, fairrah sind fram ganistai meinai waurda hropis meinis. O guþ meins wopja daga akei ni hauseis, jah naht jah ni þahains ist at mis. Akei þu is weihs, o þuei bauis hazeinos israelis. In þus trauaidedun attans unsarai, trauaidedun jah wast uslausjands ins. Du þus hropidedun jah lausidai wesun, in þus trauaidedun jah sik ni skamaidedun. Iþ ik im mata iþ ni manna, idweit manasedais jah hauns manageins. Allai þai gasaihvandans mik wairþand mik bilaikandans, rodjand wairilom wiþond haubiþ. Gawenjands ist du fraujin uslausjadau ina, galausjadau ina þande ist wiljands ina. Duþe ei þu is saei usbar mik us qiþau, so wens meina fram dilom aiþeins meinaizos. Wiþra þuk atlagiþs was ik us kilþein, fram qiþau aiþeins meinaizos guþ meins is þu. Ni fairrjais þuk us mis unte aglo ist nehva, unte ni haba hilpandan [meina]. Birunnun mik stiuros managai, þai faitans basanis bistoþun mik. Uslukun ana mis munþ seinana, [swe] liwa wilwands jah baljonds. Swe wato ik usgutnoda jah sind distahida alla baina meina, warþ hairto mein swe wahs warþ smultan inna brust meinai. Gaþaursnoda swe tegla swinþei meina jah tuggo meina gahaftnoda gomin meinamma, duh stubjau dauþaus gadailides mik. Unte birunnun mik hundos [managai] gaqumþs ubiltoje bistoþun mik, þairhstekun handuns meinos jah fotuns meinans gateihau alla baina meina. Eis atsaihvand insaihvand du mis, dailjand wastjos meinos sis jah ana gawasein meina wairpand hlauta. Akei þu o frauja ni fairrjais þuk [us mis], o swinþei meina du hilpan meina gasniumei. Galausei af hairau saiwala meina, af handau hundis þo ainahon meina. Ganasei mik af munþa liwins, jah af haurnam ainahaurne gahausidana mik habai. Kannja namo þein broþrum meinaim, in midumai gamainþais hazja þuk. O faurhtjandans fraujan hazjaiþ ina, o allai jus fraiw iakobis hauhjaiþ ina jah faurhtjaina sis ina all fraiw israelis. Duþe ei ni frakunþa nih andspaiw aglon wainahis nih affalh andaugi sein faura þamma, ak hropjandin þamma du sis was [mis]hausjands. Fram þus ist hazeins meina in gamainþai managai [awiliudo þus], gahaita meina salja faura faurhtjandam ina. Matjand wainahans jah sind sadai hazjanduh fraujan þai sokjandans ina, libaiþ hairto izwar du ajukduþai. Gamunun gahwandjand sik du fraujin allai andjos airþos, jah sind blotandeins in andwairþja þeinamma allos fadreineis þiudo. Unte fraujins sa þiudinassus ist, jah is waldiþ þiudom. Itand jah blotand allai faitans airþos, in andwairþja is biugand sik all atsteigandane dalaþ in mulda jah saiwala þizei ni skal wisan libandei. Fraiw [mein]skal skalkinon imma, rahnjada ita fraujin meinamma kuni. Qimand wairþanduh spillondans garaihtiþa is du managein gabauranai, duþe ei taujiþ [frauja].

— KG — Soh psalmo ist daweidis, Ist frauja sa haldands mik, ni haba waihtais þaurban. Ana winjom grasis [jainar] galigan mik letiþ, at watnam gahveilainais tiuhiþ mik. Saiwala meina sa wandeiþ, garaihteiþ mik in staigom garaihtiþos in namins seinis. Jah þande gagga þairh þana dal skadaus dauþaus ni og mis ubil, unte þu is miþ mis sa wandus þeins jah so hrugga þeina þo sind mik þrafstjandona. Gamanwides andwairþja meinamma biuþ wiþra þans þreihandans mik, gasalbodes alewa haubiþ mein jah sa stikls meins ist ufargutans. Jai wairþand selei jah armahairtei mik laistjandeins allans dagans libainais meinaizos, jah anahaimeis im in garda fraujins du laggein dage.

— KD — Daweidis ist psalmo, Fraujins ist airþa jah izos fullo, midjungards jah bauandans in imma. Duþe ei sa ana mareim gasulida ina, jah ana ahvom gatulgida ina. Hvas steigiþ ana þamma fairgunja fraujins, jah hvileiks standiþ ana stada is þamma weihin. Swikns lofin jah hrains hairtin, saei ni hof du uswissja saiwala seina jah ni swor du liutein [wiþra frijond seinana]. [Sah] nimiþ þiuþiqissais fram fraujin, jah garaihtiþos fram guda ganistais seinaizos. Swaleik ist kuni gasokjandane ina, þize sokjandane andaugjis þeinis o þu [guþ] iakobis Diapsalma. Ushafjaiþ o gahteis þo haubida izwara izwizuh ushafjaiþ o daurons aiweinons, inn~uþþan~gaggiþ sa þiudans wulþaus. Hvas ist jains þiudans wulþaus, frauja swinþs jah mahteigs frauja mahteiga waihjons. Ushafjaiþ o gahteis þo haubida izwara izwizuh ushafjaiþ o daurons aiweinons, inn~uþþan~gaggiþ sa þiudans wulþaus. Hvas ist jains þiudans wulþaus, frauja harje jains ist sa þiudans wulþaus Diapsalma.

— KE — Daweidis ist, א Du þus o frauja, saiwala meina ushauhja þu guþ meins. ב In þus gatrauands im ni gaskamau mik [du aiwa], nih gablauþjaina fijands meinai mik. ג Samaleiko jah allai þai þuk wenjandans ni gaskamaina sik, sik gaskamaina þai ufargaggandans sware. ד Wigans þeinans o frauja gakannei mis, jah staigos þeinos galaisei mik. ה Garaihtei mik in sunjai þeinai jah uslaisei mik, unte þu is sa guþ ganistais meinaizos þuk beidands im all þize dage. ז Gamunjais ainfalþeino þeinaizo o frauja jah armaiono þeinaizo, unte us aiwa sind ijos. ח Frawaurhtins jundais meinaizos jah þos missadedins meinos ni gamunjais, bi airkniþai þeinai gamunjais meina þu in seleins þeinaizos o frauja. ט Ist goþs jah raihts frauja, inuh þis talzeiþ frawaurhtans in wiga. י Garaihteiþ qairrjans in stauai, laiseiþ qairrjans wig seinana. כ Allos staigos fraujins sind armahairtei jah sunja, þaim habandam triggwa is jah weitwodeins is. ל In namins þeinis o frauja, jah aflet þo fairina meina unte managa ist. מ Hvileiks ist is sa manna saei faurhteiþ sis fraujan, gatalzeiþ þana in wiga þanei gawaljai sa. נ Saiwala is in þiuþa anahaimjo wairþiþ, jah fraiw is wairþiþ arbinumja airþos. ס Garehsns fraujins ist þaimei faurhtjand sis ina, jah triggwa is ist du andhuljan im. ע Augona meina sinteino sind du fraujin, unte is utattiuhiþ af natja fotuns meinans. פ Gawandei þuk du mis jah gaarmai mik, unte ainakls jah wainahs im ik. צ Aglons hairtins meinis biauknodedun, af aggwiþom meinaim ustiuh mik. ק(?) Gasaihv þulain meina jah arbaiþ meina, jah fralet allos þos frawaurhtins meinos. ר Saihv fijands meinans þatei managnodedun, jah hatiza unmanariggwamma fijand mik. ש Gafastais saiwala meina gahlausjais mik, ei ni gaskamau mik ei im trauands in þus. ת Unwammei jah raihtiþa witaina mis, unte wenja þuk [o frauja].(+) Lausei o guþ þana israel af allaim aglom is.

---

— KQ — Daweidis ist, Domei mik o frauja unte ik in unwammein meinai iddja, jah in fraujin trauaida waihtai ni wagjada. Frais mik o frauja jah kius mik, wairþ gakiusands hairþra meina jah hairto mein. Unte airkniþa þeina faura augom meinaim ist, jah im gaggands in sunjai þeinai. Ni sat miþ mannam lausaim, jah miþ liutans ni qima. Fijanda warþ gamainþ ubiltoje, jah miþ unsibjam ni sita. Usþwaha in swikniþai handuns meinos, jah bigagga hunslastaþ þeinana o frauja. Du andhafjan stibnai andahaitis [þeinis], duh gateihan alla sildaleika þeina. O frauja ik frijo þos saliþwos gardis þeinis, jah þana staþ bauainais wulþaus þeinis. Ni ganimais miþ frawaurhtam saiwala meina, miduh mannam bloþe meina libain. Þaimei in handum ize ist muns, taihswoh þizeei ist fulla bifaihonais. Iþ ik in unwammein meinai gagga, galausei mik [o frauja] jah gableiþei mik. Fotus meins standiþ ana ibnaim, in aikklesjom gaþiuþja fraujan.

— KZ — Daweidis ist, Frauja ist liuhaþ mein jah ganists meina hvana mis og, frauja ist swinþei libainais meinaizos hvana mis faurhtja. Nehvjandam ana mik ubiltojam du gamatjan leik mein, þaim þreihandam mik jah þaim fijandam meinaim mis eis silbans sukun jah drusun. Jabai driugiþ ana mik hansa, ni og sis hairto mein. Jabai reisiþ ana mik waihjo, jah þan im ik trauands. Ainata baþ ik at fraujan jainata sokjands im, þatei bauau gard fraujins in allans dagans libainais meinaizos. Du fairweitjan in skaunein fraujins, jah du gaweison alhs is. Duþe ei gafilhai mik in hleiþrai seinai in dag unþiuþis [meinis], affilhai mik in fulhsnja þaurpis seinis ana hallu usnimai mik. Jah nu ushauhjada haubiþ mein, ufar fijandam meinaim þaim bisunjane mis. Andsalja in is hleiþrai hunsla [hazeinais jah] ufwopeinais, siggwa jah ussiggwa du fraujin. Andhausei o frauja stibna meina þizaiei atwopja, gaarmai mik jah gahausei mis. Þus qiþiþ hairto mein [þatei fraujan sokja] þatei sokjaiþ nu andwairþjis meinis, þannu nu þeinis andwairþjis o frauja sokja. Ni affilhais andaugi þein faura mis, jah ni afskiubais in þwairhein skalka þeinamma. Gawaurstwa meins wast ni afletais mik, jah ni bileiþais mis o guþ ganistais meinaizos. Duþe ei atta meins jah aiþei meina biliþun mis, iþ frauja andnimiþ mik. Galaisei mik o frauja wig þeinana, jah atgaraihtei mik in staigai raihtai in þize mik hatandane. Ni fragibais mik þairh saiwala þize þreihandane mik, duþe ei usstoþun wiþra mik weitwoþs fairinondans jah uzaniþ ita inwindiþai. Aþþan galaubja gasaihvan selein fraujins, ana airþai qiwane. Gawenei du fraujin gaþrafstei þuk jah sa gaswinþeiþ hairto þein, jah wenjands sijais du fraujin.

— KH — Daweidis ist, Du þus o frauja hropja o hallu meins ni sijais þahands faura mis, ibai gaþahais faura mis jah wairþa galeikonds atsteigandam dalaþ in groba. Gahausei [o frauja] þo stibna bido meinaizo hropjandin mis du þus, mis ushafjandin handuns meinos du þamma waurda weihiþos þeinaizos. Ni gatiuh mik miþ unsibjam jah miþ waurkjandam ungaraihtein [ni fralius mik], þaim qiþandam gawairþi miþ frijondam ize iþ unþiuþ in hairtam ize. Gif im [o frauja] bi tojam ize, jah bi unþiuþa gawaurkje ize. Bi waurstwam handiwe ize gif im, usgif laun ize im. Unte ni fraþjand eis þo waurstwa fraujins jah þata taui handiwe þis, uswalteiþ ins jah ni gatimreiþ ins. Þiuþiþs ist frauja, duþe ei andhausida stibnai bidos meinaizos. Frauja ist swinþei meina jah skildus meins, in imma gatrauaida hairto mein jah gahulpans im. Jah ist swegnjando hairto mein, jah us saggwa meinamma awiliudo imma. Ist frauja swinþei im, jah so tulgiþa ganiste xristaus seinis is ist. Nasei managein þeina jah þiuþei gafreidein þeina, jah sijais haldands ins jah hauhjands ins und þana aiw.

— KÞ — Soh psalmo ist daweidis, Usgibaiþ fraujin o sunjus gude, [usgibaiþ fraujin sununs ramme] usgibaiþ fraujin wulþu jah sweriþa. Usgibaiþ fraujin wulþu namins is, inweitaiþ fraujan in skaunein weihiþos. Stibna fraujins ist ufar þaim watnam guþ sa wulþaga letiþ þeihvon, frauja ist ana watnam managaim. Stibna fraujins ist in mahtai, stibna fraujins ist in mikilduþai. Stibna fraujins brikiþ kaidruns, brikiþ þan frauja þos kaidruns libanaus. Jah letiþ ins laikan swe kalb, libanu jah seirion swe juggan ainahaurne. Stibna fraujins haggwiþ ailiþ funins, so stibna fraujins reiran letiþ auþida. Inuhreiran gataujiþ frauja þo auþida kadesais, so stibna fraujins ushnaiweiþ aiks jah andhuljiþ walþuns. Jah in þiudangardjai is, allata qiþiþ wulþu. Frauja at midjasweipainai sitiþ, jah sitiþ frauja þiudans du aiwa. Frauja swinþein managein seinai gibiþ, frauja wailaqiþiþ managein seinai in gawairþja.

— L — Soh psalmo ist saggws ananiweinais raznis, ist daweidis. Ushauhja þuk o frauja duþe ei urraisides mik, jah ni usgailides fijands meinans bi mik. O frauja þu guþ meins ik ufhropida du þus, jah þu gahailides mik. O frauja urrannides af haljai saiwala meina, anaqiwides mik af atstiga þamma in hlaiwasn. Siggwaiþ du fraujin o airknans is, anduhhaitaiþ gamaudeinai weihiþos is. Unte stik melis in þwairhein is ist, ist libains in leikainai is. In andanahtja gawisiþ grets, iþ at maurgin ist faheþs. Jah ik qaþ in digrein meinai ni gawagjada ik du aiw, o frauja in wiljin þeinamma atgaraihtides fairgunja meinamma swinþein. Afwandides andaugi þein, ik indrobnoda. Du þus o frauja ik wopida, duh fraujin meinamma aihtroda. Hva þiuþis ist in bloþa meinamma at atsteigandin mis du riurein, ibai andhaitiþ þus mulda jah gateihiþ þo sunja þeina. Andhausei o frauja gaharmai mik, o frauja sijais gawaurstwja mis. Gawandides þo qainon meina du laika mis, mis afslaupides þana sakku meinana bihgarst mik swegniþai. Ei raihtis ussiggwai þus wulþaga jah ni wairþai gaslawands, o frauja þu guþ meins im du aiwa andhaitands þus.

— LA — Prautaupsaltau, soh psalmo ist daweidis. In þus o frauja im gatrauandans ni gaskamau mik du aiwa, in garaihtiþai þeinai uslausei mik [jah galausei mik]. Anahnaiwei du mis auso þein, gasniumei galausjan mik. Sjais mis du hallau tulgjamma, du garda sunjonais du ganasjan mik. Unte stains meins jah tulgiþa meina is þu, jah in namins nu þeinis tiuhais mik jah mis waldais. Ustiuhais mik af þamma natja ei gafulhun mis, unte þu is swinþei meina [o frauja]. In handu þeina galewja ahman meinana, warst lausjands mik o frauja þu guþ sunjos. Fija þans fastandans lauseins galiugos, ik þan du fraujin traua. Fagino jah sifa in armahairtein þeinai, ei gasahvt þo agliþa meina bifanst in aglom saiwala meina. Jah ni galewides mik in handu fijandis, gasatides ana ruma fotuns meinans. Gaarmai mik o frauja unte aglo ist mis, gaþaursnoda in gaurein augo mein saiwala meina jah wamba meina. Unte fraqumana ist in saurgai libains meina jah jera meina in swogateinai, siuka warþ in fairinai meinai swinþei meina jah baina meina waurþun þaursja. Fram allaim þaim hatandam mik im idweit jah bisitandam meinaim filu jah faurhtei kunþam meinaim, gasaihvandans mik uta þliuhand faura mis. Ungamunds im swe dauþs af hairtin, im swe kas fralusano. Unte gahausja anaqiss managaize bireikei bisunjane ist, at gaqiþandam þaim alakjo ana mik usniman saiwala meina gamitodedun. Iþ ik bi þuk im trauands o frauja, qiþa guþ meins is þu. In handau þeinai sind þeihsa meina, galausei mik af handau fijande meinaize abuh mik wrikandam. Inliuhtei andaugi þein wiþra skalk þeinana, mik ganasei armaion þeinai. O frauja ni skamau mik ei im wopjands þuk, gaskamaina sik unsibjans gaslawaina at haljai. Gaþahaina wairilos anaqissais þos qiþandeins ana garaihtana, þrasabalþein in hauhhairtein jah in hauneinai. Hvaiwa managa ist selei þeina [o frauja] þoei gahabaides faurhtjandam þuk, gawaurhtes trauandam in þus faura sunum adamis. Filhis ins in analaugnein andwairþjis þeinis af ufswalleinom mans, bairgis ins in hleiþrai af andasahtai tuggono. Þiuþiþs sijai frauja, ei ustaiknida airkniþa seina þo du mis in baurg gaþwastidai. Iþ ik rodida in sniumundiþai meinai afmaitans im us augam þeinaim, aþþan gahausides þo stibna aihtronais meinaizos at hropjandin mis du þus. Frijoþ jus fraujan o allai airknans is, triggwaim gawitaiþ frauja jah andsaljiþ ufarassau þaim taujandam hauhhairtein. Þrafstjaiþ izwis jah swinþjaidau hairto izwar, o allai jus trauandans du fraujin.

— LB — Daweidis ist fraþi, Audags ist þizei fraletana ist missadeþs, þizei gafulhana ist frawaurhts. Audaga ist so manaseþs ni rahneiþ frauja þizaiei fairina, nih ist in þizozei ahmin hindarweisei. Duþe ei ik slawands warþ fairnja waurþun baina meina, mis qainondin all þize dage. Unte dag jah naht kaurus was ana mis handus þeina, wandida warþ qrammiþa meina du þaursiþai sumaris Diapsalma. Frawaurht meina ik andhulida, jah fairina meina ni afhulida. Qaþ andhaita ana mik missadedim meinaim du fraujin, jah þu aflailost þo fairina frawaurhtais meinaizos Diapsalma. Bih þata aihtroþ all airknane du þus in mela brukjamma, swaei at midjasweipain watna managa du imma ni waihtai nehvjaina sik. Þu is saliþwos meinos faura aglon gafastais mik, swegniþom uslauseinais bisatjis mik Diapsalma. Gatalzja þuk jah galaisja þuk in þamma wiga þanei þairhgaggis, gatulgja ana þus augo mein. Ni wairþaiþ swe aihvs swe mul þoei ni aigun frodein, minþlam jah tauma kaunos þizei faurwaipjaindau aiþþau ni atnehvjai sik wiþra þuk. Managa saira aig unsibja, iþ þana gatrauandan in fraujin armahairtei bigaggiþ. Sifaiþ in fraujin jah faginoþ o garaihtans, jah swegnjaiþ o allai raihtans hairtin.

— LG — Faginoþ o garaihtans in fraujin, raihtaim gadob ist hazjan. Andhaitaiþ fraujin in kiþarai, in psalteria in daikaxaurda ussiggwaiþ du imma. Siggwaiþ du imma saggw niujana, audagjaiþ ina xaurau in ufwopeinai. Unte raihtata ist waurd fraujins, jah alla waurstwa is sind in sunjai. Frijoþ garaihtein jah staua [frauja], armahairteins fraujins fulla ist airþa. Þamma waurda fraujins himinos tawidai wesun, jah þamma anadin munþis is alls sa harjis ize. Galais swe balg watna mareins, gadrag in banstins þos afgrundiþos. Sis ogjaina fraujan alla airþa, faura imma reiraina allai þai bauandans midjungard. Duþe ei sa qaþ jah waurþun, sa anabauþ jah usstoþun. Frauja gatairiþ gamiton þiudo, faurqiþiþ garehsnim manageino [jah faurqiþiþ garehsnim reikistane]. Gamitons fraujins du aiwa gastandiþ, garehsneis hairtins is sind du aldai jah aldai. Audaga ist so þiuda þizaiei frauja ist guþ izos, so managei þoei gakaus gafreidein sis. Us himina ussaihviþ frauja, gasaihviþ allans sununs manasedais. Us þamma stada bauainais seinaizos insaihviþ, du allaim bauandam airþa. Sa gaskapjands ibnaleiko hairto ize, sa atsaihvands du allaim waurstwam ize. Nist þiudanis nisandins filusnai harjis, mahteiga ni nisiþ filusnai swinþeins seinaizos. Halks ist marhs du ganistai, filusnai þan swinþeins seinaizos ni ganasjiþ. Sai ist augo fraujins du faurhtjandam ina, þaim wenjandam du armahairtein is. Du uslausjan af dauþau saiwala þize, jah usfodjan þans in huhrau. Saiwala unsara weneiþ du fraujin, [unte] hilpa unsara jah skildus unsar ist is. Unte in imma swegneiþ hairto unsar, duþe ei in namin is þamma weihin sijum gatrauandans. Sijai armahairtei þeina o frauja bi uns, swaswe wenjandans sijum du þus.

— LD — Daweidis, at wisandin imma bihlalanamma þanei gakusun ina in andwairþja abimailaixis jah sa usdraif ina jah is galaiþ. א Þiuþja fraujan in all mele, sinteino ist hazeins is in munþa meinamma. ב Bi fraujin sik hazjiþ saiwala meina, hausjand qairrjai jah swegnjand. ג Mikiljaiþ fraujan miþ mis, jah hauhjam namo is samana. ד Ik gasokida fraujan jah is gahausida mis, abuh allaim bireikeim meinaim mik galausida. ה Fairweitidedun in imma jah inliuhtidai waurþun, jah andawleizna þize ni gaaiwiskonda. ז Sah wainaha atwopida jah frauja andhausida [þana], abuh allaim aglom þis ganasida þana. ח Drauhtinoþ aggilus fraujins bisunjane faurhtjandam ina, jah nasjiþ ins. ט Andnimaiþ jah gasaihvaiþ þatei þiuþeigs ist frauja, ist audags sa wair saei trauaiþ in imma. י Izwis faurhtjaiþ fraujan o weihans is, unte nist gaidw faurhtjandam ina. כ Liwilans alaþarbans jah gredagans wairþand, iþ þai gasokjandans fraujan ni waiht haband mins allis þiuþe. ל Gaqimaiþ o barnilona hausjaiþ mik, agis fraujins laisja izwis. מ Hvileiks ist sa manna saei wili libain, saei frijoþ dagans du saihvan goþ. נ Gahabai tuggon þeina af unþiuþa, jah wairilos þeinos af waurda hindarweiseins. ס Biwandei unþiuþ jah gatawei þiuþ, sokei gawairþi jah laistei ita. ע Augona fraujins du garaihtaim sind, jah ausona is du hropa ize. פ Andaugi fraujins ist wiþra taujandans ubil, du fraqistjan af airþai gaminþja þize. צ Hropjand [garaihtai] jah frauja hauseiþ [ins], abuh allaim aglom ize lauseiþ ins. ק Nehva ist frauja gamalwidaim hairtin, jah gahaunidans ahmin nasjiþ. ר Managa sind unþiuþa garaihtins, jah af allaim þaim ina lauseiþ frauja. ש Witaiþ [frauja] allaim bainam is, ainhun ize ni habaiþ gabrikan. ת Gadauþeiþ unsibjan ubil, jah fijandans garaihtana fralusnand. (+) Galauseiþ frauja saiwalos skalke seinaize, jah ni fralusnand allai þai trauandans in imma.

— LE — Daweidis ist, Sak o frauja miþ andastauam meinaim, weih du þaim du mis weihandam. Usnim skildu jah brunjon, jah usstand in hilpai meinai. Usluk wepn gahluk wiþrawairþs faura þaim wrikandam mik, qiþ saiwalai meinai ganists þeina ik im. Skamaina sik jah unsweraindau þai sokjandans saiwala meina, gawandjaina sik ibukai jah gaaiwiskondau þai gamitondans mis ubil. Sijaina swe ahana in andwairþja windis, jah aggilus fraujins dreibai ins. Sijai wigs ize riqis jah sliupo, jah aggilus fraujins wrikai ins. Unte sware gafulhun mis þo groba natjis seinis, sware usgrobun saiwalai meinai. Qimai imma fralusts þoei nist ufkunnands, jah þata nati is þatei gafalh gafahai ina silban in fralustai gadriusai in þamma. Iþ meina saiwala sifaiþ in fraujin, faginoþ in naseinai is. Alla baina meina rodjand [o frauja] o frauja hvas þus ist galeiks, þus uslausjandin wainahana af swinþozin þau is jah wainahana jah unledana af frawilwandin ina. Usstoþun [ana mik] witoþs anamahtjandans, þizei ik ni wait fraihnand mik. Usgildand mis unþiuþ und þiuþa, usþriutada saiwala meina. Iþ ik in siukeim ize wastjos meinos habaida sakku, was gahnaiwjands fastubnjai saiwala meina. Jah bida meina in barma meinamma sik gawandida swe frijonds swe broþar mis wesun, [swa] tawida ik swe flokands aiþein [swa]ik mik hnaiwida. Akei bistigqandin mis swegnidedun jah gaiddjedun, gaiddjedun ana mik frakunþans iþ ik ni wissa tahidedun jah ni hveilaidedun. In liutam truþe nahtamatis, was kriustands ana mik tunþuns seinans. O frauja meins hvaiwa laggaba saihvands is, gawandei saiwala meina af fralustim ize af liwilam þo ainahon meina. Awiliudo þus in gamainþai managai, in managein flaizein hazja þuk. Ni faginona mis fijands unraihtai, þai hatandans mik sware ni bandwjaina augin. Unte ni gawairþi rodjand, ak ana sibjans airþos liuteins mitond. Braidjand ana mik munþ seinana, rodjand waila waila þoh gasahv augo unsar. Gasaihvands is o frauja ni sijais þahands, o frauja meins ni fairrjais þuk us mis. Urreis [o frauja] uzuhwak du stauai meinai, o guþ meins jah frauja meins du þizai sakai meinai. Stauei mik [o frauja] bi garaihtiþai þeinai o frauja þu guþ meins, jah ni faginona mis. Ni qiþaina in hairtin seinamma waila [waila] o saiwala unsara, nih qiþaina fraslundana habam ina. Gaskamaina sik jah gaaiwiskondau alakjo þai faginondans unþiuþa meinamma, gahamonda aiwiskja jah unswerein þai mikiljandans sik ana mik. Swegnjaina jah faginona þai wiljandans garaihtiþa meina, jah sijaina sinteino qiþandans mikiljaidau frauja saei wili gawairþjis skalka seinamma. Jah tuggo meina mereiþ garaihtiþa þeina, all þize dage hazein þeina.

— LQ — Prautaupsaltau, þatuh skalkis fraujins þis daweidis ist. Rodeiþ missadeþs unsibjins inna hairtin meinamma, ni waiht ist agisis gudis faura augam is. Duþe ei suþjiþ sik silban in augam seinaim, þei bigitai fairina seina du fijan. Þo waurda munþis is sind inwindiþa jah hindarweisei, ni habaiþ is fraþjan du wisan bleiþs. Ungaraihtein bisaihviþ ana badja seinamma urreisiþ ana wiga ni godamma, unþiuþa ni andspeiwiþ. O frauja ist ana himina armahairtei þeina, ist sunja þeina und milhmans. Garaihtiþa þeina ist swe fairgunja gudis, þeinos stauos sind afgrundiþa managa, guman jah dius ganasjis o frauja. Hvaiwa filugalauba ist armaio þeina o guþ, jah sunjus adamis skadau fiþro þeinaizo anaþrafstjanda. Sind drugkanai us smairþra gardis þeinis, jah þizai ahvai gabaurjoþiwe þeinaize gadragkeis ins. Unte miþ þus ist brunna libainais, in þeinamma liuhada sijum gasaihvandans liuhaþ. Laggizein gatawei armahairtein þeina du þaimei þuk witun, jah garaihtiþa þeina du raihtaim hairtin. Ni qimai mis fotus hauhhairteins, jah handus unsibjane ni dreibai mik. Jainar gadrusun [allai] þai waurkjandans inwindiþa, gadrausidai waurþun jah ni magun urreisan.

— LZ — Daweidis ist, א Ni wairþais aljanonds ubiltojam, nih sijais in neiþa taujandam ungaraihtein. Unte swe hawi suns sneiþanda, jah swe groniþa grasis sind [suns] gaþaursnandans. ב Þu trauai in fraujin jah tawei þiuþ, þu bauai airþa jah fastai sunja. Sijais gawizneigs fraujin, jah gibiþ þus þo bidanona hairtins þeinis. ג Andhulei faura fraujin wig þeinana, jah gatrauai in imma jah is gataujiþ. Utuhattiuhiþ is swe liuhaþ garaihtiþa þeina, jah staua þeina swe midjadag. ד Gakunnjais þuk faura fraujin, jah sijais wenjands du imma. Ni sijais aljanonds þeihandin swesamma wiga, þamma mann taujandin liutein. ה Anaslawais af þwairhein þukuh afwandjais af hatiza, ni aljanos und ubil. Duþe ei ubiltojos usmaitanda, iþ þai wenjandans fraujan eis arbi ganimand airþa. ו Jah leitil mais jah nist unsibja, jah saihvis þana staþ is akei ni waiht ist þar. Iþ qairrjai arbi nimand airþa, jah wairþand gawizneigai bi filusna gawairþjis. ז Mitonds ist unsibja garaihtamma, jah kriustiþ ana ina tunþuns seinans. Frauja meins hlahjiþ bi þana, unte saihviþ þatei qimands ist sa dags þis. ח Hairu uslukun unsibjans garaihtidedun bugan seinana du gadrausjan wainahana jah unledana, du afslahan raihtans wiga. Hairus ize inngaggiþ in ize hairtona, jah bugans ize gabrikanda. ט Batizo ist leitil þata garaihtins, þau gabei unsibjane managaize. Unte armos unsibjaize gabrikanda, iþ gatulgeiþ garaihtans frauja. י Wait frauja wigans unwammaize, jah arbi ize du aiwa ist. Ni skamand sik in hveilai ubilai, jah in dagam huhraus sind sadai. כ Unte unsibjans fraqistnand, jah fijands fraujins swe lunda wiþriwe frawairþand swe in rauka frawairþand. ל Skula ist unsibja akei ni usgibiþ, iþ garaihta ist hulþs jah fragibiþ. Unte þai fram imma gaþiuþidans arbi ganimand airþa, iþ þai fram imma fraqiþanans sind usmaitanai. מ Fram fraujin grideis wairis manwjanda, jah wigis þis wili [filu]. Þande driusiþ ni gadriusiþ, unte frauja ist swinþjands þo handu þis. נ Juggs ik was jah sineigs im, akei ni warþ ik gasaihvands garaihtan biliþanana nih fraiw is aihtrondo hlaibis. All þize dage ist armands jah leihvands [garaihta], jah fraiw is du þiuþeinai ist. ס Biwandei unþiuþ jah gatawei þiuþ, jah gabauis du aiwa. Duþe ei frauja frijoþ staua, jah ni wandeiþ sik us airknam seinaim sind du aiwa eis fastaidai. ע [Ungaraihtans uswairpanda], jah fraiw unsibjaize usmaitada. Garaihtans arbi nimand airþa, jah anahaimjai sind du ajukduþai ana izai. פ Munþs garaihtins andhaitiþ handugein, jah tuggo is usbairiþ staua. Witoþ gudis is ist in hairtin is, jah unsliupandeins sind grideis is. צ Niuhseiþ unsibjis bi garaihtana, sokeiduh gadauþjan ina. Frauja sik ni afwandeiþ us imma in handau þis, nih afdomeiþ ina at wisandin imma stauidamma. ק Gawenei du fraujin, jah gahabai wig is. Jah ushauheiþ þuk du arbi ganiman airþa, at usmaitanaim wisandam unsibjam skalt gasaihvan. ר Gasaihvana haba unsibjan abrana, jah urrumnandan swe lawrus grons. Akei galaiþ sa jah sai nist þis, jah ik sokida þana jah nist sa bigitans. ש Þus mundo unwammana jah gaumei raihtamma, duþe ei anawairþona þamma mann ist gawairþi. Iþ witodalausai fraliusanda alakjo, anawairþona unsibjaize usmaitanda. ת Ganists þan garaihtane ist fram fraujin, þizai swinþein ize in hveilai aglons. Gahilpiþ þan ize frauja uzuhlauseiþ ins, ins usþinsiþ af unsibjaim gahnasjiþ ins duþe ei gatrauand in imma.

— LH — Soh psalmo ist daweidis, ist du gamundai. O frauja in unwereinai þeinai ni gasakais mik, jah in moda þeinamma ni andbeitais mik. Unte arhvaznos þeinos þreihand in mik, jah þreihiþ ana mik handus þeina. Nist hailiþos in leika meinamma fram andwairþja þwairheins þeinaizos, nist gawairþjis in bainam meinaim fram andwairþja frawaurhte meinaizo. Duþe ei fairino meinaizo hauhizo warþ þau haubidis meinis, swe baurþei kaurus waurþun kaurjos ufar mik. Fulos wairþand jah sind þos banjos meinos, fram andwairþja unwitjis meinis. Siukands im jah brikans und filu, all þize dage qainonds gagga. Unte hupeis meinai usfullnodedun ubilaizos siuhtais, jah nist hailiþos in leika meinamma. Lasiws warþ jah gahniwans und filu, hropja us aglon hairtins meinis. O frauja faura þus ist alls lustus meins, jah swogateins meina faura þus nist affulhana. Hairto mein gaþlahsniþ bileiþandei mis ist swinþei meina, jah sa liuhaþ augane meinaize jah jainis nist miþ mis. Frijondans mik jah frijonds meinai faur banja meina standandans sind, jah nehvundjans meinai fairra mis gastoþun. Jah gafahan wileina þai sokjandans saiwala meina, jah þai gasokjandans ubile mis rodjand fralust jah hindarweiseins all þize dage þai sis þagkjand. Iþ ik swe bauþs ni im gahausjands, sweh unrodjands saei ni uslukiþ munþ seinana. Warþuh swe manna ik saei ni gahauseiþ, jah nist in munþa þizei gasahte. Unte du þus o frauja im wenjands, þu gahauseis o frauja meins meins guþ. Unte qiþands im ibai swegnjaina ufar mis [fijands meinai], wagidamma wisandin fotau meinamma ana mik sik mikiljand. Unte ik du drusa im manwus, jah sair mein faura mis ist sinteino. Unte þo fairina meina ik kannja, idreigo fram þizai frawaurhtai meinai. Iþ fijands meinai qiwai swinþnand [ufar mik], jah managnand þai fijandans mik inwindaba. Jah þai usgildandans mis unþiuþ und þiuþa andstandand mis, duþe ei atgagga du þiuþa. Ni bileiþais mis o frauja, o guþ meins fairra ni sijais mis. Gasniumei du hilpan meina, o frauja meins þu nasjand meins.